ຂ່າວຈາກສຳນັກງານທາງລົດໄຟຄຸນໝິງຈີນ: ນັບແຕ່ທາງລົດໄຟລາວ-ຈີນໄດ້ເປີດໃຫ້ບໍລິການຢ່າງເປັນທາງການໃນເດືອນທັນວາ ປີ2021 ເປັນຕົ້ນມາ, ດ້ວຍມີລາຄາຕ່ຳ, ຄວາມສະດວກສະບາຍ, ກາຍເປັນເສັ້ນທາງຄົມມະນາຄົມອັນສຳຄັນທີ່ເຊື່ອມຕໍ່ສອງປະເທດລາວ-ຈີນ ແລະ ອາຊີຕາເວັນອອກສ່ຽງໃຕ້ຢ່າງຫຼວງຫຼາຍ. ຊຸກຍູ້ການແລກປ່ຽນວັດທະນະທໍາ ແລະ ການພັດທະນາເສດຖະກິດລຽບຕາມທາງລົດໄຟລາວ-ຈີນ.

ມາຮອດວັນທີ 23 ຕຸລາປີນີ້, ຈໍານວນຂະບວນລົດໄຟຂົນສົ່ງຜູ້ໂດຍສານຕາມທາງລົດໄຟລາວ-ຈີນໄດ້ແລ່ນລົດຫຼາຍກວ່າ 60,000 ຖ້ຽວ ແລະ ຂົນສົ່ງຜູ້ໂດຍສານບັນລຸ 41,2 ລ້ານເທື່ອຄົນ.

ຈໍານວນຂະບວນລົດໄຟຂົນສົ່ງຜູ້ໂດຍສານຕາມທາງລົດໄຟລາວ-ຈີນ ເຖິງ 85 ຖ້ຽວ ແລະ ຂົນສົ່ງຜູ້ໂດຍສານເກືອບ 90.000 ເທື່ອຄົນ ໃນມື້ດຽວ, ໄດ້ສະແດງໃຫ້ເຫັນຄວາມສາມາດດ້ານການຂົນສົ່ງອັນແຂງແຮງ ແລະ ຄວາມຕ້ອງການອັນໃຫຍ່ຫຼວງຂອງຕະຫຼາດ.

ນັບແຕ່ຕົ້ນປີນີ້ເປັນຕົ້ນມາ, ປະລິມານການຂົນສົ່ງຜູ້ໂດຍສານຕາມທາງລົດໄຟລາວ-ຈີນໄດ້ເຕີບໂຕຢ່າງວ່ອງໄວ.ຕາມສະຖິຕິ,ແຕ່ວັນທີ 1 ມັງກອນ ຫາ ວັນທີ 23 ຕຸລາປີນີ້,ໄດ້ດຳເນີນຂະບວນລົດໄຟຂົນສົ່ງຜູ້ໂດຍສານ 20.000 ກວ່າຖ້ຽວ,ຂົນສົ່ງຜູ້ໂດຍສານຫຼາຍກວ່າ 15,7 ລ້ານ ເທື່ອຄົນ.ໃນນັ້ນ, ວັນທີ 19 ຕຸລານີ້, ທາງລົດໄຟລາວ-ຈີນໄດ້ຂົນສົ່ງຜູ້ໂດຍສານຂ້າມຊາຍແດນ 1.280 ກວ່າເທື່ອຄົນ, ໄດ້ສ້າງສະຖິຕິສູງສຸດ ນັບແຕ່ເປີດນໍາໃຊ້ເປັນຕົ້ນມາ.

ການເປີດເສັ້ນທາງລົດໄຟໂດຍສານສາກົນຕາມທາງລົດໄຟລາວ-ຈີນ ໄດ້ສ້າງຄວາມສະດວກໃຫ້ແກ່ຜູ້ໂດຍສານຈາກທົ່ວໂລກໃນການເດີນທາງຂ້າມແດນ.

ມາຮອດປະຈຸບັນ, ມີຜູ້ໂດຍສານປະມານ 200.000 ຄົນທີ່ມາຈາກ 100 ກວ່າປະເທດ ແລະ ເຂດແຄວ້ນໄດ້ບັນລຸການເດີນທາງຂ້າມຊາຍແດນໂດຍຜ່ານທາງລົດໄຟລາວ-ຈີນ. ຜູ້ໂດຍສານເຫຼົ່ານີ້ສ່ວນຫຼາຍແມ່ນມາຈາກລາວ, ໄທ, ມາເລເຊຍ ແລະ ປະເທດອື່ນໆ ສ່ວນໃຫຍ່ຈະໄປຫຼວງພະບາງ ,ວຽງຈັນຂອງລາວ ແລະ ຄຸນມິງ, ດາລີ, ລີຈຽງ ແລະ ອື່ນໆຂອງຈີນ ເພື່ອການທ່ອງທ່ຽວ ແລະ ແລກປ່ຽນວັດທະນະທຳ.